ພວຕ ລົງໂຄສະນາເຜີຍແຜ່ ກົດໝາຍ ແລະ ນິຕິກໍາ ຢູ່ເມືອງເມິງ Print
Written by Administrator   
Tuesday, 06 March 2018 08:25

ໃນຕອນເຊົ້າ ຂອງວັນທີ 28 ກຸມພາ 2018 ທີ່ຜ່ານມານີ້ ພະແນກ ວິທະຍາສາດ ແລະ ເຕັກໂນໂລຊີ ແຂວງບໍ່ແກ້ວ ໄດ້ສົມທົບກັບ ຫ້ອງການ ວິທະຍາສາດ ແລະ ເຕັກໂນໂລຊີ ເມືອງເມິງ ຈັດກອງປະຊຸມ ເຜີຍແຜ່ກົດໝາຍ ແລະ ນິຕິກໍາ ຂອງວຽກງານ ວິທະຍາສາດ ແລະ ເຕັກໂນໂລຊີ ຂຶ້ນ ຢູ່ທີ່ຫ້ອງປະຊຸມ ຫ້ອງວ່າການ ເມືອງເມິງ ໂດຍໃຫ້ກຽດເປັນປະທານ ຂອງທ່ານ ພັນໄຊ ອຸດົມສຸກ ຄະນະປະຈໍາພັກເມືອງ ຮອງເຈົ້າເມືອງໆ ເມິງ ແລະ ປະທານຮ່ວມ ຂອງທ່ານ ຄອນໄຊ ສະຕິ ຫົວໜ້າພະແນກ ວິທະຍາສາດ ແລະ ເຕັກໂນໂລຊີ ແຂວງບໍ່ແກ້ວ.

ພາຍໃນກອງປະຊຸມໄດ້ເຊື້ອເຊີນ ເອົາບັນດາ ການນໍາຂອງເມືອງ, ຫົວໜ້າຫ້ອງການ, ຮອງຫົວໜ້າຮອງການ, ອໍານາດການປົກຄອງບ້ານ, ຜູ້ປະກອບການ ຊາວຄ້າຂາຍ ແລະ ພະນັກງານ-ວິຊາການ ຂອງແຂວງ ແລະ ເມືອງເຂົ້າຮ່ວມທັງໝົດ 52 ທ່ານ, ຍິງ 12 ທ່ານ. ຈາກນັ້ນກອງປະຊຸມ ໄດ້ຮັບຟັງການລາຍງານໂດຍຫຍໍ້ ຂອງທ່ານ ນາງ ຄໍາຫຼ້າ ອຸດົມສຸກ ຮອງຫົວໜ້າ ຫ້ອງການ ເວິທະຍາສາດ ແລະ ເຕັກໂນໂລຊີ ເມືອງເມິງ ກ່ຽວກັບວຽກງານການເຄື່ອນໄຫວ ຂອງ ຫ້ອງການ ວິທະຍາສາດ ແລະ ເຕັກໂນໂລຊີ ປະຈໍາເມືອງເມິງ, ເຊິ່ງມັນໄດ້ສະແດງອອກເຖິງຜົນສໍາເລັດ ແລະ ບາງໜ້າວຽກທີ່ຈະຕ້ອງໄດ້ເອົາໃຈໃສ່ປັບປຸງແກ້ໄຂໃຫ້ດີຂຶ້ນ.

ອກຈາກຮັບຟັງການລາຍງານຜ່ານໄປນັ້ນ, ກອງປະຊຸມໄດ້ ຮັບຟັງການເຊື່ອມຊືມ ບັນດາກົດໝາຍ ແລະ ນິຕິກໍາ ທີ່ສໍາຄັນຄື:

1. ກົດໝາຍ ວ່າດ້ວຍ ວິທະຍາສາດ ແລະ ເຕັກໂນໂລຊີ, 2. ກົດໝາຍ ວ່າດ້ວຍ ຊັບສິນທາງປັນຍາ, 3. ກົດໝາຍ ວ່າດ້ວຍ ມາດຕະຖານ, 4. ກົດໝາຍ ວ່າດ້ວຍ ການວັດແທກ, 5. ກົດໝາຍ ວ່າດ້ວຍ ທຸລະກໍາ ທາງເອເລັກໂຕຣນິກ, 6. ຂໍ້ຕົກລົງ ຂອງທ່ານເຈົ້າແຂວງໆ ບໍ່ແກ້ວ ສະບັບເລກທີ 29/ຈຂ-ບກ, ລົງວັນທີ 11 ມັງກອນ 2016 ວ່າດ້ວຍການຈັດຕັ້ງ ແລະ ການເຄື່ອນໄຫວ ວຽກງານຂອງພະແນກ ວິທະຍາສາດ ແລະ ເຕັກໂນໂລຊີ ແຂວງບໍ່ແກ້ວ; 7. ຂໍ້ຕົກລົງ ຂອງທ່ານເຈົ້າແຂວງໆ ບໍ່ແກ້ວ ສະບັບເລກທີ 299/ຈຂ-ບກ, ລົງວັນທີ 14 ມີນາ 2017 ວ່າດ້ວຍການຄຸ້ມຄອງ, ກວດກາ, ກວດສອບ ແລະ ສອບທຽບ ຜະລິດຕະພັນສິນຄ້າ ທີ່ລະເມີດລິຂະສິດ, ຊັບສິນອຸດສະຫະກໍາ ແລະ ລອກຮຽນແບບເຄື່ອງໝາຍການຄ້າ ທີ່ເຂົ້າມາຊົມໃຊ້ຢູ່ພາຍໃນແຂວງບໍ່ແກ້ວ ແລະ ສົ່ງອອກໃຫ້ຖືກຕ້ອງຕາມມາດຕະຖານແຫ່ງຊາດລາວ ແລະ ມາດຕະຖານສາກົນ (ISO) ເພື່ອຈັດຕັ້ງປະຕິບັດການຈັດເກັບລາຍຮັບເຂົ້າງົບປະມານຂອງແຂວງ.

ຫຼັງຈາກການນໍາສະເໜີ ບັນດາກົດໝາຍ ແລະ ນິຕິກໍາ ຜ່ານໄປຜູ້ເຂົ້າຮ່ວມກອງປະຊຸມ ກໍ່ໄດ້ປະກອບຄວາມຄິດເຫັນ, ແລກປ່ຽນ ສົນທະນາກັນກ່ຽວກັບການຈັດຕັ້ງປະຕິບັດໃນຕໍ່ໜ້າ ແລະ ໃຫ້ເຂົ້າສູ່ລະບຽບການ,  ຈາກນັ້ນທ່ານ ຄອນໄຊ ສະຕິ ຫົວໜ້າພະແນກ ວິທະຍາສາດ ແລະ ເຕັກໂນໂລຊີແຂວງ ໄດ້ໃຫ້ກຽດມີຄໍາເຫັນຕໍ່ກອງປະຊຸມວ່າ ການທີ່ພວກເຮົານໍາພາທີມງານຂອງແຂວງ ນໍາເອົາບັນດາກົດໝາຍ ແລະ ນິຕິກໍາລົງມາໂຄສະນາ ເຜີຍແຜ່ໃນຄັ້ງນີ້ ກໍ່ເພື່ອໃຫ້ບັນດາທ່ານໄດ້ຮັບຮູ້ ແລະ ເຂົ້າໃຈແຈ້ງ ກ່ຽວນະໂຍບາຍຂອງພັກ-ລັດ, ກໍ່ຄືວຽກງານ ວິທະຍາສາດ ແລະ ເຕັກໂນໂລຊີ, ເພາະວຽກດັ່ງກ່າວເປັນວຽກທີ່ ມີຄວາມຖ້າທາຍ ແລະ ເພື່ອປົກປ້ອງຜູ້ຊົມໃຊ້ ແລະ ຜູ້ບໍລິການ ໃຫ້ມີຄວາມສະເໝືອພາບກັນແລ້ວ; ຍັງເປັນການກວດກາ ກວດສອບ ສີນຄ້າທີ່ບໍ່ໄດ້ມາດຕະຖານຕື່ມອີກ, ທີ່ເວົ້າມານັ້ນກໍ່ເພື່ອເປັນການກະຕຸກຍຸກຊູ້ ໃຫ້ຜູ້ປະກອບການ ຊາວຄ້າຂາຍ ແລະ ຜູ້ຊົມໃຊ້ ມີຄວາມຍືນຍົງ ມີຊວນຮ່ວວມຊ່ວຍກັນສ້າງສາພັດທະນາປະເທດຊາດ.

ຕ້ອນທ້າຍ ກອງປະຊຸມ ໄດ້ຮັບຟັງການໂອ້ລົມ ຂອງທ່ານ ພັນໄຊ ອຸດົມສຸກ ຄະນະປະຈໍາພັກເມືອງ ຮອງເຈົ້າເມືອງໆ ເມິງ; ທ່ານໄດ້ຮຽກຮ້ອງມາຍັງຜູ້ເຂົ້າຮ່ວມກອງປະຊຸມ ແລະ ຖັນແຖວພະນັກງານ, ອໍານາດການປົກຄອງຂັ້ນບ້ານ, ຜູ້ປະກອບການ, ຊາວຄ້າຂາຍ ໃຫ້ເປັນເຈົ້າການນໍາກັນ ໃນການຈັດຕັ້ງປະຕິບັດ, ໃຫ້ຄວາມຮ່ວມໄມ້ຮ່ວມມື ອໍານວຍຄວາມສະດວກ ແກ່ພະນັກງານ-ວິຊາການທີ່ກ່ຽວຂ້ອງ ແລະ ພ້ອມທັງເປັນຫູເປັນຕາຊ່ວຍກັນ ໃນການສະກັດກັ້ນ ສີນຄ້າທີ່ບໍ່ໄດ້ມາດຕະຖານ ແລະ ຄຸນນະພາບ, ສີນຄ້າລອກຮຽນແບບ ເພື່ອເຮັດໃຫ້ສັງຄົມມີຄວາມສະຫງົບສຸກ ປະເທດຊາດມີຄວາມຈະເລີນຮຸ່ງເຮື່ອງ.

  

ຂຽນຂ່າວ ແລະ ຮູບພາບໂດຍ: ປະກາສິດ ທໍາມະວົງ  

  

 

 

Last Updated on Tuesday, 06 March 2018 09:40