ຜົນສໍາເລັດກອງປະຊຸມ ປະເມີນລັດຖະກອນ ພວຕ ແຂວງ ປີ 2017 Print
Written by Administrator   
Monday, 25 September 2017 13:05

ເພື່ອເປັນການຕິດຕາມ ແລະ ຕີລາຄາຄືນ ຜົນຂອງການຈັດຕັ້ງປະຕິບັດ ວຽກງານຂອງລັດຖະກອນ ພາຍໃນ ພະແນກ ວິທະຍາສາດ ແລະ ເຕັກໂນໂລຊີ ແຂວງ ແລະ ແຈ້ງການແນະນໍາ ຂອງພະແນກ ພາຍໃນແຂວງ, ສະບັບເລກທີ 428/ພພນ, ລົງວັນທີ 9 ພຶດສະພາ 2017 ວ່າດ້ວຍການຕີລາຄາ ປະເມີນຜົນ ການປະຕິບັດວຽກງານ ຂອງລັດຖະກອນ ປະຈໍາປີ 2017.

ວັນທີ່ 21-22 ກັນຍາ 2017 ທີ່ຜ່ານມານີ້ ພະແນກ ວິທະຍາສາດ ແລະ ເຕັກໂນໂລຊີ ແຂວງບໍ່ແກ້ວ ໄດ້ໄຂກອງປະຊຸມ ຕີລາຄາປະເມີນຜົນ ວຽກງານລັດຖະກອນ ຂຶ້ນຢ່າງເປັນທາງການ ຢູ່ຫ້ອງປະຊຸມ ພະແນກ ວິທະຍາສາດ ແລະ ເຕັກໂນໂລຊີແຂວງ; ພາຍໃຕ້ການເປັນປະທານ ຂອງທ່ານ ຄອນໄຊ ສະຕິ ຫົວໜ້າ ພະແນກ ວິທະຍາສາດ ແລະ ເຕັກໂນໂລຊີແຂວງ, ມີຄະນະຮັບຜິດຊອບ ຈາກພະແນກ ພາຍໃນແຂວງ ແລະ ລັດຖະກອນ ພາຍໃນພະແນກ ເຂົ້າທັງໝົດ 24 ທ່ານ, ຍິງ 8 ທ່ານ.

ເພື່ອເປັນບ່ອນອີງ ແລະ ເຮັດໃຫ້ບັ້ນດໍາເນີນຕີລາຄາ ປະເມີນຜົນ ການຈັດຕັ້ງ ປະຕິບັດວຽກງານ ຂອງລັດຖະກອນ ໄດ້ຮັບການດໍາເນີນໄປດ້ວຍດີ, ທ່ານ ຄອນໄຊ ສະຕິ ຫົວໜ້າ ພະແນກ ວິທະຍາສາດ ແລະ ເຕັກໂນໂລຊີແຂວງ ໄດ້ໃຫ້ກຽດກ່າວເປີດກອງປະຊຸມຂຶ້ນຢ່າງເປັນທາງການ; ກອງປະຊຸມໄດ້ຮັບຟັງ ແລະ ເຊື່ອມຊືມບັນດາເອກະສານສໍາຄັນຕ່າງໆ ດັ່ງລຸ່ມນີ້.

-     ເຊື່ອມຊືມກົດໝາຍ ວ່າດ້ວຍ ພະນັກງານ-ລັດຖະກອນ ສະບັບເລກທີ 74/ສພຊ, ລົງວັນທີ 18 ທັນວາ 2015.

-     ຜ່ານບົດສະຫຼຸບປະຈໍາສົກປີ 2017 ແລະ ທິດທາງແຜນການປະຈໍາປີ 2018.

ກອງປະຊຸມ ຕີລາຄາປະເມີນຜົນການ ປະຕິບັດວຽກງານ ຂອງພະນັກງານ-ລັດຖະກອນ ໄດ້ໄຂຂຶ້ນ ເພື່ອສັງເກດຕີລາຄາຜົນການຈັດຕັ້ງ ປະຕິບັດ ການຊີ້ນໍາ ນໍາພາ ຂອງພະນັກງານ ນໍາພາຄຸ້ມຄອງ ຢູ່ພະແນກ ວິທະຍາສາດ ແລະ ເຕັກໂນໂລຊີແຂວງ, ຕາມລະບຽບ ຂອງລັດຖະກອນ ຕະຫຼອດໄລຍະ 01 ປີທີ່ຜ່ານມາ. ເພື່ອຊອກເຫັນໄດ້ດ້ານດີ - ດ້ານອ່ອນ ແລະ ຂໍ້ຄົງຄ້າງ, ລັດຖະກອນດີເດັ່ນ ແລະ ລັດຖະກອນ ປະເພດຕ່າງໆ ເພື່ອພ້ອມກັນປັບປຸງກໍ່ສ້າງ ພະນັກງານ-ລັດຖະກອນ ໃຫ້ກາຍເປັນ ພະນັກງານທີ່ມີຄວາມຮູ້ຄວາມສາມາດ, ເປັນກອງນໍາໜ້າທີ່ແທ້ຈິງ ແລະ ເປັນແບບຢ່າງອັນດີໃຫ້ແກ່ການຈັດຕັ້ງກໍ່ຄືມະຫາຊົນ. ເພື່ອໃຫ້ສາມາດບັນລຸໄດ້ຕາມຈຸດປະສົງ, ລະດັບຄາດໝາຍດັ່ງກ່າວ ແລະ ເຮັດໃຫ້ກອງປະຊຸມໄດ້ດໍາເນີນໄປຢ່າງມີບັນຍາກາດ ທັງຮັບປະກັນໄດ້ເນື້ອໃນອັນຄົບຖ້ວນ, ດໍາເນີນໄປຢ່າງເປັນລະບົບ ຖືກຕ້ອງຕາມລະບຽບການຂອງພັກ-ລັດ ທີ່ໄດ້ກໍານົດໄວ້. ພາຍໃນກອງປະຊຸມໄດ້ມີການແບ່ງປັນຄວາມຮັບຜິດຊອບ ໃຫ້ພະນັກງານ-ລັດຖະກອນ ເພື່ອເປັນເຈົ້າການ ໃນການດໍາເນີນກອງປະຊຸມ ປະເມີນຜົນການຈັດຕັ້ງ ປະຕິບັດວຽກງານຂອງລັດຖະກອນ ໂດຍຄວາມຮັບຜິດຊອບສູງ;

ພະນັກງານ-ລັດຖະກອນພາຍໃນພະແນກ ວິທະຍາສາດ ແລະ ເຕັກໂນໂລຊີແຂວງ ໄດ້ພ້ອມກັນຮັບຟັງ ການຜ່ານບົດສະຫຼຸບປະຈໍາສົກປີ 2017 ການເຄື່ອນໄຫວນໍາພາໃນໄລຍະ 01 ປີຜ່ານມາ ແລະ ທິດທາງແຜນການໃນສົກປີ 2018; ຈາກນັ້ນກໍ່ໄດ້ຜ່ານບົດສໍາຫຼວດ ການນໍາພາ ຂອງພະແນກ ວິທະຍາສາດ ແລະ ເຕັກໂນໂລຊີ ແລະ ພະນັກງານ-ລັດຖະກອນ ໄດ້ພັດປ່ຽນກັນຂຶ້ນຜ່ານບົດສໍາຫຼວດ ຕີລາຄາປະເມີນຜົນ  ການປະຕິບັດວຽກງານ ຂອງຕົນໃນການເຄື່ອນໄຫວ ຈັດຕັ້ງປະຕິບັດຕະຫຼອດໄລຍະ 01 ປີຜ່ານມາ, ພ້ອມທັງພາກັນຄົ້ນຄ້ວາປະກອບຄໍາຄິດ-ຄໍາເຫັນ, ຕໍານິສົ່ງຊ່ວຍເຫຼືອເຊິ່ງກັນ ແລະ ກັນຢ່າງເປັນຂະບວນຟົດຟື້ນ. 

 

 

Last Updated on Monday, 25 September 2017 13:25