ພວຕ ບໍ່ແກ້ວ ປະດັບຫຼຽນ ແລະ ຍ້ອງຍໍຜົນງານ 5 ປີ Print
Written by Administrator   
Monday, 17 September 2018 02:39

ພະແນກ ວິທະຍາສາດ ແລະ ເຕັກໂນໂລຊີ ແຂວງບໍ່ແກ້ວ ຈັດພິທີປະດັບຫຼຽນ ແລະ ມອບ-ຮັບໃບຍ້ອງຍໍຜົນງານ ການປົກປັກຮັກສາ, ສ້າງສາພັດທະນາ ແຂວງບໍ່ແກ້ວ ແຕ່ປີ 2012-2017 ໂອກາດສະເຫຼີມສະຫຼອງ ວັນສ້າງຕັ້ງ ແຂວງບໍ່ແກ້ວ ຄົບຮອບ 35 ປີ.

ຕອນບາຍຂອງວັນທີ 14 ກັນຍາ 2018 ຢູ່ທີ່ຫ້ອງປະຊຸມພະແນກ ວິທະຍາສາດ ແລະ ເຕັກໂນໂລຊີ ແຂວງບໍ່ແກ້ວ ໄດ້ຈັດພິ ຍ້ອງຍໍຜົນງານ ປະດັບຫຼຽນ ແລະ ໃບຍ້ອງຍໍຂັນລັດຖະບານຂຶ້ນ. ໂດຍເປັນກຽດເຂົ້າຮ່ວມເປັນທານ ຂອງທ່ານ ຈອມສີ ລັດຕະນະປັນ ຄະນະປະຈໍາພັກແຂວງ ຮອງເຈົ້າແຂວງໆ ບໍ່ແກ້ວ, ມີຄະນະພັກ ຄະນຳ, ພະນັກງານ ພະແນກ ວິທະຍາສາດ ແລະ ເຕັກໂນໂລຊີແຂວງ ແລະ ແຂກຖືກເຊີນເຂົ້າຮ່ວມຢ່າງພ້ອມພຽງ; ໃນໂອກາດດັ່ງກ່າວ ທ່ານ ວິໄລເອກ ໄຊສະຫງວນ ຫົວໜ້າ ຂະແໜງ ບໍລິຫານ-ຈັດຕັ້ງ ໄດ້ຂຶ້ນຜ່ານ ລັດຖະດຳລັດ ຂອງປະທານປະເທດ ສາທາລະນະລັດ ປະຊາທິປະໄຕ ປະຊາຊົນລາວ ວ່າດ້ວຍການປະດັບ ຫຼຽນໄຊແຮງງານ ສະບັບເລກທີ 097/ປປທ, ນະຄອນຫຼວງວຽງຈັນ, ວັນທີ 29 ມີນາ 2018, ດໍາລັດ ຂອງນາຍົກລັດຖະມົນຕີ ວ່າດ້ວຍການປະດັບຫຼຽນການແຮງງານ ແລະ ມອບໃບຍ້ອງຍໍລັດຖະບານ; ສະບັບເລກທີ 106/ນຍ, ນະຄອນຫຼວງວຽງຈັນ, ວັນທີ 26 ມີນາ 2018. 

ພະແນກ ວິທະຍາສາດ ແລະ ເຕັກໂນໂລຊີ ແຂວງບໍ່ແກ້ວ ໄດ້ຮັບການປະດັບ ຫຼຽນໄຊແຮງງານຊັ້ນ 2 ຈໍານວນ 2 ທ່ານ;  ຫຼຽນໄຊແຮງງານຊັ້ນ 3 ຈໍານວນ 2 ທ່ານ, ຍິງ 1 ທ່ານ ແລະ ໄດ້ຮັບໃບຍ້ອງຍໍລັດຖະບານ 10 ທ່ານ, ຍິງ 1 ທ່ານ; ເຊິ່ງໃຫ້ກຽດປະດັບຫຼຽນ ແລະ ມອບໃບຍ້ອງຍໍລັດຖະບານຄັ້ງນີ້ ໂດຍແມ່ນ ທ່ານ ຈອມສີ ລັດຕະນະປັນ ຄະນະປະຈໍາພັກແຂວງ ຮອງເຈົ້າແຂວງໆ ບໍ່ແກ້ວ.

ຈາກນັ້ນທ່ານຍັງໄດ້ມີຄໍາເຫັນໂອ້ລົມ ຕໍ່ຄະນະພັກ ຄະນະນໍາ ແລະ ພະນັກງານ ພາຍໃນພະແນກ ວິທະຍາສາດ ແລະ ເຕັກໂນໂລຊີ, ເຊິ່ງທ່ານໄດ້ຕີລາຄາສູງຕໍ່ຜົນສໍາເລັດທີ່ທາງພະແນກ ຂອງພວກເຮົາຍາດແຍງມາໄດ້ໃນໄລຍະຜ່ານມາ ແລະ ຍ້ອງຍໍຊົມເຊີຍຕໍ່ຜົນງານທີ່ໄດ້ຮັບໃນຄັ້ງນີ້, ເຊິ່ງມັນເປັນຂີດໝາຍອັນສໍາຄັນ ຕໍ່ການປະຕິບັດໜ້າທີ່ວຽກງານ, ກໍ່ຄືພາລະກິດ ປົກປັກຮັກສາ, ສ້າງສາພັດທະນາ ປະເທດ ຊາດ ເວົ້າລວມ ເວົ້າສະເພາະ ແຂວງບໍ່ແກ້ວ ຂອງພວກເຮົາ; ທ່ານຍັງໄດ້ມີທິດຊີ້ນໍາ ກ່ຽວກັບການຈັດຕັ້ງປະຕິບັດ ແລະ ການປັບປຸງກໍ່ສ້າງ ພະນັກງານໃນຖັນແຖວຂອງຕົນ ໃຫ້ແທດເໝາະກັບສະພາບຄວາມເປັນຈີງ, ເອົາໃຈໃສ່ຄົ້ນຄວ້າ ຮໍ່າຮຽນບັນດານິຕິກໍາອື່ນທີ່ກ່ຽວຂ້ອງ ເພື່ອເປັນບ່ອນອີງໃນການຈັດຕັ້ງປະຕິບັດວຽກງານໃນແຕ່ລະດ້ານ; ເພີ່ມທະວີ ຄວາມເປັນເຈົ້າການ ເອົາໃຈໃສ່ ເຮັດຫຼ້ອນໜ້າທີ່ໆ ພັກລັດມອບໝາຍໃຫ້ ພ້ອມກັນນັ້ນກໍ່ຕ້ອງຮັກສາມູນເຊື້ອອັນດຸໝັ້ນ ຂະຫຍັນພຽນ, ເຕົ້າໂຮມຄວາມສາມັກຄີ ອ້າຍນ້ອງພະນັກງານ ຊ່ວຍເຫຼືອເຊິ່ງກັນ ແລະ ກັນ ພ້ອມພາກັນ ຈັດຕັ້ງປະຕິບັດວຽກງານໃຫ້ມີຜົນສໍາເລັດເປັນກ້າວໆ ແລະ ລາຍງານຂັ້ນເທິງເປັນປົກກະຕິ.

  

   

ພາບ ແລະ ຂ່າວໂດຍ: ປະກາສິດ ທຳມະວົງ 

 

Last Updated on Monday, 17 September 2018 03:58